لبیک یارسول اللہ والا اسٹیکر لگا ہو تو بیت الخلاء جانا
سوال:مفتی صاحب، مفتی صاحب اگر قمیض پر لبیک یا رسول اللّٰہ صلی اللّٰہ علیہ وآلہ وسلّم کا کلپ لگا ہوتو کیا بندہ بیت الخلاء جا سکتا ہے؟
(سائل:سید زرغام علی شاہ)
بسم اللہ الرحمن الرحیم
الجواب بعون الملک الوہاب اللہم ہدایۃ الحق والصواب
لبیک یا رسول اللہ والا اسٹیکر لگا کر بیت الخلاء جانا بے ادبی کے سبب، مکروہ و ممنوع ہے، شرعی حکم یہ ہے کہ اس اسٹیکر کو اتار کر باہر کسی محفوظ جگہ رکھ دیں یا پھر جیب میں ڈال کر بیت الخلاء جائیں۔
مراقی الفلاح مع حاشیۃ الطحطاوی میں ہے : ويكره الدخول للخلاء ومعه شيء مكتوب فيه اسم الله أو قرآن… ثم محل الكراهة إن لم يكن مستورا فإن كان في جيبه فإنه حينئذ لا بأس به. یعنی قرآن مجید یا اسمائے الہیہ میں سے کسی لکھی ہوئی چیز کے ساتھ بیت الخلاء داخل ہونا مکروہ ہے…یہ مکروہ اس وقت ہے جب وہ متبرک کلمات چھپے ہوئے نہ ہوں (ورنہ مکروہ نہیں) پس اگر وہ تحریر کسی کی جیب میں ہو تو اس میں کوئی حرج نہیں۔[حاشية الطحطاوي على مراقي الفلاح ،کتاب الطہارۃ ،فصل فی الإستنجاء ]
مجمع الانھر شرح ملتقی الابحر میں ہے : وكذا ( مکروہ)دخول الخلاء وفي إصبعه خاتم فيه شيء من القرآن أو من أسماء الله – تعالى لما فيه من ترك التعظيم…ولو كان ما فيه شيء من القرآن أو من أسماء الله تعالى في جيبه لا بأس به وكذا لو كان ملفوفا في شيء لكن التحرز أولى.
[عبد الرحمن شيخي زاده، مجمع الأنهر في شرح ملتقى الأبحر، کتاب الطہارۃ ،٢٦/١]
واللہ اعلم عزوجل ورسولہ اعلم صلی اللہ علیہ وآلہ وسلم کـتبـــــــــــــــــــــــہ
ابوالحسن محمد حق نوازمدنی
22 شعبان المعظم 1445ء 04 مارچ 2024ھ