موت کی دعا کرنا کیسا ہے؟اور بندہ اپنی زندگی سے تنگ آگیا ہو تو کیا کرے؟
بسم اللہ الرحمن الرحیم
الجواب بعون الملک الوھاب اللھم ھدایۃ الحق وا لصواب
کسی مصیبت کی وجہ سے موت کی دعا کرنا منع ہے،اس لئے کہ مسلمان کی زندگی اس کے حق میں غنیمت ہے۔ہاں یوں دعا کی جاسکتی ہے الٰہی ! زندہ رکھ جب تک زندگی میرے حق میں بہتر ہے اور مجھے موت دے جب موت میرے حق میں بہتر ہو،اور بندہ جب اپنی زندگی سے تنگ آجائے تو اللہ پاک کی رحمت کا امید وار رہے اور اللہ عزوجل سے نیک گمان رکھے۔
صحیح بخاری میں ہے:قال النبیﷺ’’لا یتمنین احدکم الموت من ضرّ اصابہ فان کان لا بدّ فاعلاً،فلیقل اللھم احیینی ما کانت الحیاۃ خیرا لی و توفنی اذا کانت الوفاۃ خیراًلی‘‘ ترجمہ:نبی کریمﷺ نے ارشاد فرمایا تم میں سے کوئی بھی مصیبت کے پہنچنے کی وجہ سے مو ت کی آرزو نہ کرے پس اسے ضرور کرنی ہی ہو تو اسے چاہئے کہ یوں کہے اے اللہ مجھے زندہ رکھ جب تک زندگی میرے حق میں بہتر ہے اور مجھے موت دے جب موت میرے حق میں بہتر ہو۔
(صحیح البخاری، صفحہ۹۲۹،حدیث۵۶۷۱،مطبوعہ دار الحضارۃ)
صحیح مسلم میں ہے:عن جابر ابن عبداللہ ،قال:سمعت رسوللہﷺ قبل موتہ بثلاثۃ ایام ،یقول:’’لایموتن احدکم الا و ھو یحسن الظن باللہ عزوجل‘‘ترجمہ:جابر بن عبداللہ سے روایت ہے وہ کہتے ہیں میں نے رسول اللہﷺ سے سناان کی ظاہری حیات سے رخصت ہونے سے تین دن پہلے کہ تم میں سے کوئی نہ مرے مگر اس حالت میں کہ اللہ عزوجل سے نیک گمان رکھتا ہو۔
(صحیح مسلم،صفحہ۹۱۳،حدیث۲۸۷۷،مطبوعہ دار الحضارۃ)
بہارِ شریعت میں ہے:’’کسی مصیبت پرموت کی آرزو نہ کرے کہ اس کی ممانعت آئی ہے اور ناچار کرنی ہی ہے تو یوں کہے، الہی مجھے زندہ رکھ جب تک زندگی میرے ليے خیر ہو اور موت دے جب موت میرے ليے بہتر ہو۔ اور مسلمان کو چاہيے کہ اللہ عزوجل سے نیک گمان رکھے، اس کی رحمت کا امیدوار رہے‘‘۔
(بہارِ شریعت،حصہ۴،صفحہ۸۱۲،مطبوعہ مکتبۃ المدینہ کراچی)
اللہ اعلم عزوجل ورسولہ اعلم صلی اللہ تعالیٰ علیہ وآلہ وسلم
کتبـــــــــــــــــــــــــــہ
تنویر حسین عطاری