کیا فرماتے ہیں علمائے دین و مفتیانِ شرعِ متین اس مسئلے کے بارے میں کہ روزے کا فدیہ دینے کی اجازت کس کس کو ہے اور کب ہے اور کتنا ہے؟
بسم الله الرحمٰن الرحیم
الجواب بعون الملک الوهاب اللهم هدایة الحق والصواب
روزے کا فدیہ دینے کی اجازت فقط شیخ فانی کو ہے جس کی عمر اسی سال ہو اور وہ روزہ رکھنے کی اصلا طاقت نہ رکھتا ہو اور بڑھاپے کی وجہ سے اب دوبارہ صحت کی امید بھی نہ ہو، ایسے شخص کو روزہ ترک کرنا جائز ہے اور اس پر انتقال تک ہر فرض روزے کے بدلے صدقۂ فطر کی مقدار فدیہ دینا واجب ہے،یعنی ایسا شخص ہر روزے کے بدلے میں کم از کم ایک کلو نو سوبیس گرام (1,920 GRAM) گندم یا اس کی قیمت صدقۂ واجبہ کے طور پر ادا کرے گااور جو شخص اتنی استطاعت نہ رکھتا ہوتو اس کو توبہ و استغفار کرتے رہنا چاہئے، بے شک اللہ عزوجل غفار ہے۔ اس فدیہ کا مصرف زکوۃ اور دیگر صدقاتِ واجبہ کی طرح ہے (یعنی فقیر محتاج مسلمان کو دیا جائے گا جو کہ نہ ہاشمی ہو اور نہ ہی اس کے اصول و فروع میں سے ہو،وغیرہ)
یاد رکھئے! اگر ایسا بوڑھا روزہ رکھنے پر دوبارہ قادر ہو جائے تو جن روزوں کا فدیہ دے چکا ان کی بھی قضا کرے گااور وہ فدیہ صدقۂ نفل ہوگیا۔ البتہ اگر کوئی صرف اتنا بوڑھا ہے کہ اکٹھے روزے نہیں رکھ سکتا تو جتنے ممکن ہو اتنے رکھ لےاور بقیہ کی بعد میں قضا کرلے،اسی طرح اگر صرف گرمیوں میں وہ روزہ رکھنے پر قادر نہ ہو،تو بھی فدیہ نہیں دے سکتا بلکہ فی الوقت رخصت ہے سردیوں میں ان روزوں کی قضا کرے، بعض جاہل جو صحیح سلامت ہوتے ہوئے بھی روزےچھوڑ کر ان کا فدیہ دے کر اپنے آپ کو بریٔ الذمہ سمجھتے ہیں، ایسوں کو اللہ عزوجل کے قہر و غضب سے ڈرنا چاہئے۔ یاد رہے! روزے کا فدیہ دینے کی صرف شیخِ فانی (جس کی تفصیل اوپر گزری) کو اجازت ہے۔
اللہ تبارک وتعالیٰ قرآنِ پاک میں ارشاد فرماتا ہے:”وَ عَلَى الَّذِیْنَ یُطِیْقُوْنَهٗ فِدْیَةٌ طَعَامُ مِسْكِیْنٍؕ” ترجمۂ کنزالایمان:اور جنہیں اس کی طاقت نہ ہو وہ بدلہ دیں ایک مسکین کا کھانا۔ (سورة البقرہ،آیت نمبر:184)
حضرت ابن عباس رَضِيَ اللَّهُ تَعَالٰی عَنْهُ نے فرمایا: “إنما هي للشيخ الكبير والمرأة الكبيرة اللذين لا يستطيعان أن يصوما” یعنی: یہ آیت صرف شیخِ فانی (بوڑھے مرد)اور بوڑھی عورت کے لیے ہےجو روزہ رکھنے کی طاقت نہیں رکھتے۔
(تفسیرالسمرقندی،جلدنمبر1،صفحہ نمبر 122(
فقیہِ حنفیہ علامہ حسن بن عمار شرنبلالی رَحْمَۃُ اللہِ تَعَالٰی عَلَیْھ(المتوفی 1069ھ)فرماتے ہیں: “يجوز الفطر لشيخ فان وعجوز فانية وتلزمهما الفدية” یعنی: شیخ فانی (بوڑھے مرد)اور بوڑھی عورت کے لئے روزہ نہ رکھنا جائز ہے اور ان دونوں پر فدیہ لازم ہے۔ (نورالایضاح ونجاۃ الارواح، کتاب الصوم، فصل فی العوارض،صفحہ نمبر:141، مطبوعہ: المکتبۃ العصریہ)
اعلی حضرت امامِ اہل سنت امام احمد رضا خان رَحْمَۃُ اللہِ تَعَالٰی عَلَیْھ(المتوفی 1340ھ) فرماتے ہیں: “بعض جاہلوں نے یہ خیال کر لیا ہے کہ روزے کا فدیہ ہر شخص کے لئےجائز ہے جبکہ روزے میں اسے کچھ تکلیف ہو، ایسا ہرگز نہیں، فدیہ صرف شیخِ فانی کے لئے رکھا ہے جو بسبب پیرانہ سالی حقیقۃً روزہ کی قدرت نہ رکھتا ہو،نہ آئندہ طاقت کی امید کہ عمر جتنی بڑھے کی ضعف بڑھے گااس کے لئے فدیہ کا حکم ہے۔” (فتاویٰ رضویہ،جلدنمبر 10، صفحہ نمبر 528، مطبوعہ:رضا فاؤنڈیشن)
اعلی حضرت امامِ اہل سنت امام احمد رضا خان رَحْمَۃُ اللہِ تَعَالٰی عَلَیْھ(المتوفی 1340ھ) ایک مقام پر فرماتے ہیں: “شیخِ فانی پر روزے کا فدیہ حیات میں دینا واجب ہے اگر قادر ہو، بعدِ مرگ وجوب نہیں جب تک اپنے مال میں وصیت نہ کرے۔”
(فتاوی رضویہ، جلدنمبر 10، صفحہ نمبر552 بتغیر، مطبوعہ:رضا فاؤنڈیشن)
فقیہ حنفیہ علامہ حسن بن عمار شرنبلالی رَحْمَۃُ اللہِ تَعَالٰی عَلَیْھ(المتوفی 1069ھ)شیخِ فانی کی تعریف کرتے ہوئے فرماتے ہیں: “ان یعجز عن الاداء فی الحال ویزاد کل یوم عجزه الی أن یکون تأکد الموت بسبب الهرم” یعنی: وہ (بوڑھا)جو اس وقت (روزہ) ادا کرنے سے عاجز ہو اور اس کے عجز (یعنی اس کے بڑھاپے) میں ہر دن اضافہ ہوتا رہے یہاں تک کہ اس کے بڑھاپے کی وجہ سے اس پر موت واقع ہو جائے۔
(امداد الفتاح شرح نورالایضاح، کتاب الصوم، فصل فی العوارض،صفحہ نمبر700، مطبوعہ:صدیقی پبلشرز)
اعلی حضرت امامِ اہل سنت امام احمد رضا خان رَحْمَۃُ اللہِ تَعَالٰی عَلَیْھ(المتوفی 1340ھ) فرماتے ہیں: “شیخِ فانی کی عمر اسّی یا نوے سال لکھی ہے اور حقیقۃً بنائے حکم اس کی حالت پر ہے اگر سو برس کا بوڑھا روزے پر قادر ہے شیخِ فانی نہیں اور اگر وہ ستّر برس میں بوجہ ضعفِ بیّنہ بڑھاپے سے ایسا زارو نزار ہو جائے کہ روزے کی طاقت نہ رہے تو شیخِ فانی ہے۔غرض شیخِ فانی وہ ہے جسے بڑھاپے نے ایسا ضعیف کر دیا ہواور جب اس ضعف کی علت بڑھاپا ہوگاتو اس کے زوال کی امید نہیں اسے روزے کے عوض فدیہ کا حکم ہے۔” (فتاوی رضویہ، جلد نمبر 10، صفحہ نمبر 556 بتغیر، مطبوعہ:رضافاؤنڈیشن)
علامہ سید احمد بن محمد طحطاوی حنفی رَحْمَۃُ اللہِ تَعَالٰی عَلَیْھ(المتوفی 1231 ھ) در مختار پر اپنے حاشیے میں تحریر فرماتے ہیں:”وتلزمها الفدیة کالفطر” یعنی: شیخِ فانی پر فدیہ فطرانے کی طرح کا لازم ہے۔”
(حاشیہ الطحطاوی علی مراقی الفلاح، کتاب الصوم، فصل فی العوارض، صفحہ نمبر688 ملتقطاً، مطبوعہ:دار الکتب العلمیہ بیروت)
علامہ علاء الدین محمد بن علی حصکفی رَحْمَۃُ اللہِ تَعَالٰی عَلَیْھ (المتوفی 1088ھ) فرماتے ہیں: “ويفدي وجوبا ولو في أول الشهر وبلا تعدد فقير كالفطرة” یعنی: شیخِ فانی واجب طور پر فدیہ دے گا، اگرچہ مہینے کے شروع میں ہی دے دے فطرے کی طرح ،فقیر کے متعدد ہونے کے بغیر۔
(الدر المختار شرح تنویر ،کتاب الصوم، باب مایفسد الصوم …،فصل فی العوارض،جلد نمبر1، صفحہ150، مطبوعہ:دار الکتب العلمیہ)
صدر الشریعہ، بدر الطریقہ مفتی امجد علی اعظمی عَلَیْہِ رَحمَۃُ اللّٰہِ الْقَوِی (المتوفی 1367ھ) فرماتے ہیں: “شیخ فانی یعنی وہ بوڑھا جس کی عمر ایسی ہوگئی کہ اب روزبروز کمزور ہی ہوتا جائے گا، جب وہ روزہ رکھنے سے عاجز ہو یعنی نہ اب رکھ سکتا ہے نہ آئندہ اُس میں اتنی طاقت آنے کی اُمید ہے کہ روزہ رکھ سکے گا، اُسے روزہ نہ رکھنے کی اجازت ہے اورہر روزہ کے بدلے میں فدیہ یعنی دونوں وقت ایک مسکین کو بھر پیٹ کھاناکھلانا اس پرواجب ہے یا ہر روزہ کے بدلے میں صدقۂ فطر کی مقدار مسکین کو دیدے۔” (بہارِ شریعت، جلد نمبر 5، صفحہ نمبر1009، مطبوعہ:مکتبۃ المدینہ)
فقیہ حنفیہ علامہ حسن بن عمار شرنبلالی رَحْمَۃُ اللہِ تَعَالٰی عَلَیْھ(المتوفی 1069ھ)فرماتے ہیں: “وهی لکل یوم نصف صاع من بر او قیمته بشرط دوام العجز إلی الموت” یعنی: اور فدیہ ہر دن کے لئے گندم میں سے آدھا صاع یا اس کی قیمت ہے بشرط یہ کہ اس کا عجز موت تک باقی رہے۔
(امدادالفتاح شرح نورالایضاح، کتاب الصوم، فصل فی العوارض، صفحہ نمبر701، مطبوعہ:صدیقی پبلشرز)
یاد رہے! ایک صاع 4 کلو میں سے 160 گرام کم اور نصف یعنی آدھا صاع 2کلو میں سے 80 گرام کم کا ہوتا ہے۔ تو نصف صاع 1920 گرام ہوا۔ شیخِ فانی ایک روزے کے بدلے میں کم ازکم 1 کلو 920 گرام گندم یا اس کی قیمت بطورِ فدیہ دے گا۔
فقیہ حنفیہ علامہ حسن بن عمار شرنبلالی رَحْمَۃُ اللہِ تَعَالٰی عَلَیْھ(المتوفی 1069ھ)تحریر فرماتے ہیں:”فإن لم یقدر من تجوز له الفدية علی الفدیة لعسرته یستغفر الله سبحانه ویستقیله” یعنی: اور اگر ایسا شخص جس کے لئے فدیہ دینا جائز ہے(یعنی شیخِ فانی) تنگدستی کی وجہ سے فدیہ دینے پر قادر نہ ہو تو اللہ سبحانہ وتعالی کے حضور استغفار کرے اور معافی طلب کرتا رہے۔
(امداد الفتاح شرح نور الایضاح، کتاب الصوم، فصل فی العوارض، صفحہ نمبر701، مطبوعہ:صدیقی پبلشرز)
اعلی حضرت امامِ اہل سنت امام احمد رضا خان رَحْمَۃُ اللہِ تَعَالٰی عَلَیْھ(المتوفی 1340ھ) فرماتے ہیں: “مصرف اس کا مثل مصرفِ صدقۂ فطر و کفارہ یمین و سائر کفارات و صدقات واجبہ ہے بلکہ کسی ہاشمی مثلاً شیخ علوی یا عباسی کو بھی نہیں دے سکتے۔ غنی یا غنی مرد کے نابالغ فقیر بچے کو نہیں دے سکتے کافر کو نہیں دے سکتے، جو صاحبِ فدیہ کی اولاد میں ہے جیسے بیٹا بیٹی، پوتا پوتی، نواسا نواسی،یا صاحبِ فدیہ جس کی اولاد میں جیسے ماں باپ، دادا دادی، نانا نانی، انہیں نہیں دے سکتے، اقربا مثلاً بہن بھائی، چچا، ماموں خالہ، پھوپھی، بھتیجا، بھتیجی، بھانجا، بھانجی، ان کو دے سکتے ہیں جبکہ اور موانع نہ ہوں۔”
(فتاوی رضویہ، جلد 10، صفحہ نمبر535، مطبوعہ:رضا فاؤنڈیشن)
مزید ایک مقام پر ارشاد فرماتے ہیں: “اس کے وہی مستحق ہیں جو زکاۃ کے مستحق ہیں، فقیر محتاج مسلمان کہ نہ ہاشمی ہوں، نہ اس کی اولاد، نہ یہ اُن کی اولاد۔” (فتاوی رضویہ، جلدنمبر دہم، صفحہ نمبر555، مطبوعہ:رضافاؤنڈیشن)
علامہ علاء الدین محمد بن علی حصکفی رَحْمَۃُ اللہِ تَعَالٰی عَلَیْھ (المتوفی 1088ھ) فرماتے ہیں: “متی قدر قضی” یعنی: جب شیخِ فانی قادر ہو جائے تو قضا کرے۔
(الدرالمختار شرح تنویر الابصار، کتاب الصوم، فصل فی العوارض، جلد1، صفحہ نمبر150، مطبوعہ:دار الکتب العلمیہ)
علامہ احمد بن محمد طحطاوی حنفی رَحْمَۃُ اللہِ تَعَالٰی عَلَیْھ(المتوفی 1231 ھ) فرماتے ہیں: “فمن قدرا قضیا” یعنی: پس اگر شیخِ فانی(بوڑھا مرد) اور بوڑھی عورت (روزے رکھنے پر) قادر ہو جائیں تو (جن روزوں کا فدیہ دیا) انہیں قضا کریں۔
(حاشیہ الطحطاوی علی مراقی الفلاح، کتاب الصوم، فصل فی العوارض، صفحہ نمبر688 ، مطبوعہ:دار الکتب العلمیہ بیروت)
مفتی امجد علی اعظمی رحمۃ اللہ علیہ فرماتے ہیں: “اگر فدیہ دینے کے بعد اتنی طاقت آ گئی کہ روزہ رکھ سکے، تو فدیہ صدقۂ نفل ہو کر رہ گیا ان روزوں کی قضا رکھے۔” (بہارِ شریعت، جلد پنجم، صفحہ نمبر1009، مطبوعہ: مکتبۃ المدینہ)
علامہ محمد امین بن عمر ابن ِ عابدین رَحْمَۃُ اللہِ تَعَالٰی عَلَیْھ(المتوفی 1252ھ) فرماتے ہیں: “لو لم یقدر علیه لشدة الحر کان له أن یفطر ویقضیه فی الشتاء” یعنی: اگر شیخِ فانی روزے پر گرمی کی شدت کی وجہ سے قدرت نہیں رکھتا تو وہ روزہ نہ رکھے اور سردیوں میں اس کی قضا کرے۔
(ردالمحتار علی الدرالمختار، کتاب الصوم، فصل فی العوارض المبیحۃ لعدم الصوم، جلد3، صفحہ نمبر427، مطبوعہ:دارالفکر بیروت)
والله اعلم عزوجل ورسوله اعلم صلی الله تعالی علیه واله وسلم
کتــــــــــــــــــــــــــــــــــــــــــــــــــــــــــــــــــــــــــــــــــــــــبه
احمدرضا عطاری حنفی عفی عنہ