شب معراج کونسی تاریخ کو ہوئی؟
سوال:مفتی صاحب، کیا شب معراج ستائیس رجب کو ہے ،کچھ لوگ اسکا انکار کرتے ہیں ،کیا اسکی تاریخ حدیث سے ثابت ہے؟
(سائل:محسن عزیز)
بسم اللہ الرحمن الرحیم
الجواب بعون الملک الوہاب اللہم ہدایۃ الحق والصواب
شب معراج کی تاریخ کے متعلق علمائے امت کے مختلف اقوال ہیں لیکن صحیح ومشہور رجب کی 27 تاریخ ہے، تمام علاقوں میں اسی پر عمل ہے، البتہ احادیث میں تاریخِ شب معراج کا ذکر نہیں۔
شب معراج کے متعلق مختلف اقوال بیان کرتے ہوئے علامہ سلیمان بن محمد بن عمر شافعی علیہ الرحمتہ تحفۃ الحبیب میں فرماتے ہیں : والصحيح أن ليلة الإسراء ليلة سبع وعشرين في رجب. یعنی صحیح یہ ہے کہ شب معراج رجب کی ستائیسویں رات ہے۔
[البجيرمي، حاشية البجيرمي على الخطيب، تحفة الحبيب على شرح الخطيب، كتاب الصلاة ، ٣٨٣/١ ]
امام طحطاوی علیہ الرحمتہ مختلف اقوال نقل کرتے ہوئے ارشاد فرماتے ہیں : وقيل ليلة سبع وعشرين من رجب وعليه العمل في جميع الأمصار وجزم به النووي في الروضة تبعا للرافعي. یعنی کہا گیا ہے کہ رجب کی ستائیس تاریخ (شب معراج) ہے، تمام علاقوں میں اسی پر عمل ہے امام نووی نے امام رافعی کی اتباع کرتے ہوئے الروضۃ (الروضۃ الطالبين ) میں اسی پر جزم فرمایا۔
[حاشية الطحطاوي على مراقي الفلاح شرح نور الإيضاح،كتاب الصلاة ، صفحة ١٧٢]
فتاوی شامی میں ہے: وقيل في رجب وجزم به النووي في الروضة تبعا للرافعي، وقيل في شوال. وجزم الحافظ عبد الغني المقدسي في سيرته بأنه ليلة السابع والعشرين من رجب، وعليه عمل أهل الأمصار.
[ابن عابدين، الدر المختار وحاشية ابن عابدين،كتاب الصلاة ،٣٥٢/١]
واللہ اعلم عزوجل ورسولہ اعلم صلی اللہ علیہ وآلہ وسلم کـتبـــــــــــــــــــــــہ
ابوالحسن محمد حق نوازمدنی
26 رجب المرجب 1445ء 07 فروری 2023ھ