چندہ جمع کرنے والے کا فیصد کے اعتبار سے اجرت لینا

چندہ جمع کرنے والے کا فیصد کے اعتبار سے اجرت لینا

سوال:مفتی صاحب، مدرسے والوں نے مدرسے کے سامنے مین روڈ پر چندے کے لیے، ایک آدمی رکھا ہے، جس کے ساتھ ٹوٹل چندے 100% میں سے 40% طے ہوا ہے، کیا یہ درست ہے؟

(سائل :حکیم باروی)

بسم اللہ الرحمن الرحیم

الجواب بعون الملک الوہاب اللہم ہدایۃ الحق والصواب

♦ جس طرح مدرسے والوں نے چندہ کرنے والے شخص سے اجارہ کیا اس انداز میں اجارہ کرنا شرعا درست نہیں، کیونکہ اولا تو یہاں اُجرت ہی مجہول ہے، معلوم نہیں کہ کل کتنا چندہ ہو گا جسکے چالیس فیصد کو اُجرت قرار دیا جائےگا جبکہ اجارہ میں بوقت عقد اجرت کا معلوم و معین ہونا ضروری ہوتا ہے ورنہ اجارہ فاسدہوجاتا ہے، نیز ہمارے یہاں چندہ جمع کرنے کے لیے اس طرح اجرت مقرر کر نے کا عرف بھی نہیں۔

♦ یہاں ایک خرابی یہ بھی ہے کہ یہاں اجیر کے اپنے عمل سےحاصل شدہ چندےکو اجرت مقرر کیا جا رہا ہے جو قفیز طحان کی صورت ہے اور اس سے حدیث پاک میں منع کیا گیا ہے، لہذا یہ اجارہ فاسد ہے، فریقین پر فوری اس معاہدے کو ختم کرنا لازم ہے،نیز اب تک جو ہوا اس میں چندہ کرنے والے مزدور کو اجرت مثل یعنی وہاں اتنے کام کی جتنی مزدوری بنتی ہے وہ ملے گی،اور جمع شدہ تمام چندہ مدرسے کا ہو گا ۔

المبسوط میں ہے : والاستئجار بأجرة مجهولة بمنزلة بيع بثمن مجهول….ثم البيع بثمن مجهول يكون فاسدا، فكذلك الاستئجار بأجرة مجهولة. یعنی مجہول اجرت پر اجارہ کرنا ایسا ہی ہے جیسے مجہول ثمن پر کوئی چیز بیچنا…. تو جیسے مجہول ثمن پر خرید و فروخت فاسد ہے ایسے ہی مجہول اجرت پر اجارہ بھی فاسد ہے۔ [المبسوط للسرخسي،،کتاب المزارعۃ، ١٨/٢٣]

بدائع الصنائع میں ہے :إذا استأجر رجلا ليطحن له قفيزا من حنطة بربع من دقيقها أو ليعصر له قفيزا من سمسم بجزء معلوم من دهنه أنه لا يجوز؛ لأن الأجير ينتفع بعمله من الطحن والعصر فيكون عاملا لنفسه وقد روي عن رسول الله صلى الله عليه وسلم أنه نهى عن قفيز الطحان. [الكاساني، بدائع الصنائع في ترتيب الشرائع،كتاب الإجارة،١٩٢/٤]

بہار شریعت میں ہے: اجارہ پر کام کرایا گیااور یہ قرار پایا کہ اسی میں سے اتنا تم اُجرت میں لے لینا یہ اجارہ فاسد ہے۔ (بہار شریعت،اجارہ کا بیان)

واللہ اعلم عزوجل ورسولہ اعلم صلی اللہ علیہ وآلہ وسلم کـتبـــــــــــــــــــــــہ

ابوالحسن محمد حق نوازمدنی

21 شوال الکرم 1445ء 30 اپریل 2024ھ